LAOAG CITY – Rinugianen ti Gilas Pilipinas ti naiget a panagsanay sumagmamano nga aldaw sakbay ti maisayangkat a friendly games idiay Doha, Qatar.
Inbatad ni Gilas coach Tim Cone a ti pannakipasetda iti Qatar ket paset metten ti panagsagsaganada para iti third window ti FIBA Asia Cup Qualifiers.
Umuna a makalabanda ti Qatar ken Lebanon inton Pebrero 15 ken ti Egypt met inton Pebrero 17.
Gapu ta nakastrekdan ti FIBA Asia Cup 2025 inton bulan ti Agosto ket usarenda dagiti nasao nga ay-ayam tapno mapapigsa pay ti koponan.
Babaen ti friendly games idiay Qatar ket ad-adda a masanay da AJ Edu ken Jamie Malonzo ken tapno maka-adjust-da iti kinaawan ni Kai Sotto nga agpapaimbag pay laeng.
Inadmitir ni Cone a no saanda a kualipikado iti FIBA Asia Cup ket saanda a makipaset iti friendly games iti Doha ken tutokanda lattan ti labanda iti Chinese Taipei ken New Zealand.
Naammoan a saan a makaay-ayam idiay Qatar ni Japeth Aguilar gapu iti personal a rason.
Maipalagip a makalaban met ti Gilas ti Chinese Taipei inton Pebrero 20 a maisayangkat idiay Taiwan idinto ti New Zealand inton Pebrero 23.
