LAOAG CITY – Ginasut a negosyo iti Minnesota ti nagserra kalpasan ti panangiyuswat ti tignay protesta dagiti rinibo a tattao kontra iti manarimaan nga immigration crackdown iti estado.
Ti nalawa a tignay protesta ket napasamak kalpasan a ginutigot dagiti organizers dagiti residente a saan a mapan sumrek iti trabaho ken kadagiti pagadalan, ken saan da paylaeng a mapan ag-shopping tapno ipakita ti naiget a panangkontra da iti US Immigration and Customs Enforcement (ICE).
Maipalagip a ti operasyon ti Immigration and Customs Enforcement iti Minnesota ket mandar ni US President Donald Trump, ken daytoy ket addan ti nasurok nga innem a lawas a maisaysayangkat.
Immunan nga inkalintegan ti Trump Administration a ti ar-aramiden da ket maibilang kas public safety operation a gagem na a maideportar amin dagiti criminal nga illegal a simrek iti Estados Unidos.
