Inpakaammo ti Bureau of the Treasury (BTr) a plano ti administrasion Marcos ti umutang iti P629 billion manipud kadagiti local lenders iti umuna a tallo a bulan ti 2025 tapno mapunno ti budget deficit ti pagilian.
Nasurok a doble ti gatad ti P310 bilion nga utang idi naudi a paset ti 2024.
Mainaig iti daytoy, P264 bilion ti target a maala manipud iti Treasury bills (T-bills), idinto a P365 bilion ti aggapu iti Treasury bonds (T-bonds).
Namnamaen ti Bureau of the Treasury nga aglako iti T-bills nga aggatad iti P88 billion iti kada bulan manipud Enero agingga iti Marso, idinto a ti T-bonds ket puntiriada a makaurnong iti P125 billion inton Enero, P115 billion inton Pebrero, ken P125 billion manen inton Marso.
Panggep ti gobierno ti umutang iti dagup a P2.55 trillion inton tawen 2025 tapno mataming ti naiproyekto a P1.54 trillion a budget deficit, a katukag ti 5.3 porsiento iti gross domestic product ti pagilian.
