LAOAG CITY – Makipinnirma ti Provincial Government nga irepresentar ni Governor Cecilia Araneta Marcos iti Department of Environment and Natural Resources iti Sustainable Forest Land Management Agreements (SFLMAs).
Segun kenni Board Member Saul Lazo, Chairman ti Committee on Laws, ti nasao a katulagan ket tapno maikkan ti gundaway dagiti pribado a kompanya a mangusar ti lote a nakainagan iti gobierno ngem masapol a matagiben ti aglawlaw ken awan ti madi nga epektona.
Mainaig iti daytoy, inlawlawag met ni Vice Governor Matthew Marcos Manotoc a masapol a ti gobierno probinsyal ken ti ahensya wenno Government to Government ti agtinnulag sakbay a makipag-kontrata ti gobierno iti pribado a kompanya.
Kuna ni Manotoc a maysa kadagiti ditoy ket ti Suba Sand Dunes no sadinno adda ti solar energy project a maimplementar ngem nasken a masigurado a saan a maperdi ti tourism activity.
Malaksid iti daytoy ket ti pannaka-usar dagiti timberland kadagiti mountainous area para ti agrikultura wenno pagmulaan kadagiti nagduduma afruit bearing trees ken dagiti mabalin a pamastrekan.
Kabayatanna, inbatad ni Ms. Soya Bueno, iti INVest Office nga adda dagiti nakitada a lugar a karaman iti daytoy a katulagan karaman ti lote iti Brgy. Davila, Pasuquin nga asideg ti Highway.
