LAOAG CITY – Dakkel ti ngimmatoan ti nakolektar ti gobierno probinsial iti panag-quarry itay napalabas a tawen 2021 no maidasig iti koleksion idi tawen 2020.
Daytoy ti siraragsak nga inpakaammo ni Provincial Administrator Atty. Yvette Leynes, agserserbi a mangidadaulo iti Provincial Quarry Office.
Kunana a manipud iti 26.8 million pesos a nakolektar idi tawen 2020 ket ngimmato agingga iti 43.8 million pesos iti 2021.
Inpannakkelna a gapu iti daytoy a nagapoanan ti Provincial Quarry Office ket kinumendaran ti Commission on Audit wenno COA dagitoy.
Mainaig iti daytoy, mangnamnama ni Leynes a kas iti kalikagum ni Gob. Matthew Marcos Manotoc ket agtultuloy a maurnos dagiti permit dagiti amin a “quarry permittee” ditoy probinsia.
Inbatadna a babaen iti daytoy ket ad-adu pay ti koleksion ti gobierno probinsial tapno ad-adu pay a kakailian ti matulungan.
Innayonna a babaen iti naiget nga implimentasyon ti “mining act” ditoy probinsia ket maipangato pay ti makolekta ti gobierno probinsial manipud iti operasyon ti panag-quarry.
