LAOAG CITY – Nagkiddaw ti gobierno probinsyal kadagiti amin a media iti intero a probinsya a tumulong a mangpalagip kadagiti mannalon a saan da pay laeng nga agraraep ken agbunubon.
Inbatad daytoy ni Mr. Edwin Cariño, iti kapitolyo probinsyal kalpasan ti pannakaisarita na kenni Gov. Imee Marcos.
Daytoy ket gapo ta ita nga aldaw ti panangibunong da kadagiti ayuda a bunubon ken irik kadagiti mannalon gapo iti bagyo Ompong nangruna idiay ili ti Nueva Era, Banna, Marcos ken Dingras.
Segun kenni Cariño, urayen kuma dagiti mannalon a malpas ti mapasungadan a Bagyo Rosita.
Nagpanawagan daytoy kadagiti publiko a saan pay laeng nga agbunubon nangruna kadagiti paset ti taltalon a mabalin a pagnaan ti danom gapo ta maiyanod to met laeng dagitoy.
