LAOAG CITY – Saan pay laeng a kissayan wenno isuspenso ti gobierno ti buis iti diesel ken gasolina kalpasan ti panangtingiting ti Department of Finance (DOF) ken ti UPLIFT Committee.
Iti Malacañang press briefing, inlawlawag ni Finance Usec. Karlo Fermin Adriano a kasapulan nga agannad ti gobierno iti panaggastos nangruna ket addan ti immunan nga addang ni Presidente Ferdinand Marcos Jr. nga ikkaten pay laeng ti buis iti LPG ken kerosene.
Gapu iti daytoy, mapatta-patta a ₱4.1 bilyon nga insigida ti mapukaw iti biruk ti gobierno iti uneg ti tallo a bulan.
No iraman pay ti diesel ken gasolina, posible nga umabot iti ₱43.6 bilyon ti mapukaw a biruk isu a saan a makitkita a praktikal iti agdama.
Nakatutok ti gobierno iti “targeted ayuda” wenno tulong a diretso kadagiti kangrunaan nga apektado.
Innayon pay ni Adriano, ad-adu a babaknang ti agus-usar ti diesel isu a nasaysayaat nga isentro ti ayuda kadagiti agkasapulan.
