LAOAG CITY – Nangilatang ti Gobierno Probinsial ti Ilocos Norte ti duagasut a ribu a pisos para iti pannakaiyestablisar ti Eco Park kadagiti amin a Barangay ditoy probinsia.
Segun ken ni Gob. Matthew Marcos Manotoc, gutgutigutenna dagiti amin a Barangay Chairman ken Mayor a papintasen ken padur-asen pay ti Barangay Eco Park a maysa pay kadagiti kadakkelan a proyektona iti daytoy a tawen.
Ti Eco Park ket addaan ti tallo a components, umuna ket Regular Park a community space a mabalin a panganan, pagay-ayaman dagiti ubbing ken pag-ehersisyuan dagiti bumaranggay.
Maikadua ket Agri-component a Barangay Farm a pakasarakan kadagiti nasustansia a prutas ken natnateng kas iti marunggay a manamnama a makatulong ti sibubukel a Barangay a pangalaan iti aniaman a mula a natnateng.
Maikatlo a component iti Eco-Park Project ti Gobernador ket Composting a naiyestablisar iti Brgy. 54-A, Camanggaan ditoy Siudad ti Laoag itay kallabes.
Napanunutan ni Manotoc daytoy a proyekto tapno adda iti pagay-ayaman dagiti ubbing saan laeng nga addada iti pagtaengan gapu iti pandemiya a mapaspasaran iti agdama.
No pay kasta, gapu iti kellaat a panagngato ti bilang dagiti kaso ti COVID-19 ditoy probinsia ket kasapulan pay laeng nga agtalinaed kadagiti pagtaengan.
