LAOAG CITY – Nagturongen ni Gov. Matthew Marcos Manotoc idiay Cebu City tapno makipaset iti closing program ti Palarong Pambansa 2024.
Daytoy ti inpakaammo ni Mr. Gervy Games Gumarit, mangidadaulo ti Provincial Communications and Media Office.
Segun kenkuana, nagbiahe ti Gobernador itay laeng bigat ken iti agdama ket nakadanon daytoyen iti siudad ti Cebu.
Inbatadna a ti panagatendar ni Gov. Manotoc iti nasao a closing ceremony ket napateg gapu ta ditoy a maigiddan ti turn over ceremony iti panag-host ti Ilocos Norte ti Palarong Pambansa inton tawen 2025.
Inlawlawagna a nupay ita laeng a maiyuswat ti turn over ceremony ket nabayagen nga inrugi ti probinsia iti panagsagsagana para iti panag-host ti Ilocos Norte.
Kunana a malaksid ken ni Gov. Manotoc ket nagturong pay isuna pakairamanan da Mrs. Helen Domingo, mangidadaulo ti Provincial Sports and Development Office ken Mr. Faivo Bartolome tapno agatendar ti nasao a programa.
Naammoan a ti closing program ti Palarong Pambansa 2024 ket manamnama a maisayangkat inton bigat, Hulio 16 no sadinno a malaksid iti panakabigbig ti lugar a pakaangayan ti Palarong Pambansa inton tawen 2025 ket ditoy pay a mairakurak no ayanno a lugar idiay Mindanao ti ag-host para iti Palarong Pambansa 2026.
Immunan a naammoan ti Bombo Radyo Laoag a malaksid ken ni Gov. Manotoc ket manamnama pay nga agatendar da Department of Education Secretary Sara Duterte ken Sen. Imee Marcos.
