LAOAG CITY – Plano ni Governor Cecilia Araneta Marcos a maipatungpal ti Household composting ditoy probinsia ita a tawen.
Segun kenkuana, masapul a maipangpangruna dagiti programa maipanggep iti pannakatagiben ti aglawlaw.
Mamati ti gobernador a dakkel a tulong daytoy gapu ta kaaduan nga umili ti addaan ti kabukbukudan a mula a natnateng iti arubayan.
Inbatadna a babaen iti nasao a programa ket masigurado nga organic ti abono a mausar kadagiti mula a natnateng ket masigurado a natalged a maipauneg.
Kabayatanna, inpakaammo ni Gov. Marcos nga adda dagiti sumagmamano a kompania nga interesado a mangestablisar ti planta ti enerhia a ti mausar ket basura.
Inbatadna a kitkitaenda a naimbag ti kapabilidad ti mailunglungalong a proyekto agsipud ta ti lungalong ti kompania ket Private Public Partnership.
Kunana a ti nasao a kompania ti mangpundo iti proyekto ken ti gobierno probinsial ti mangipaay iti lote a pakaipasdekan ti proyekto.
Inpettengna a maysa kadagiti ipanpannakkel ti kompania ket no agballigi ti proyekto, daytoy ti mangitunda iti kaawanton ti mapagbalin a “landfill” ditoy probinsia a maibilang a saan a nasayaat a wagas iti panangtagiben iti basura gapu ta magabgaburan laeng ti daga dagiti basura.
Innayonna a ti panagkitana ket napintas ti nasao a proyekto gapu ta kabayatan a maiprosproseso dagiti basura ket daytoy met ti mangpataud ti enerhia.
