LAOAG CITY – Indeklara ni Gov. Matthew Marcos Manotoc ti pannakasuspinde ti trabaho kadagiti opisina ti gobierno ken klase iti amin a lebel iti pampubliko ken pribado a pagadalan ita nga aldaw, Agosto 30 iti intero a probinsia ti Ilocos Norte gapu iti Supertyphoon Goring.
Nupay kasta, dagiti opisina ti gobierno nga adda iti emergency, health ken frontline services ket agtalinaed nga operasional.
Mainaig iti daytoy, ginutigot ni Gov. Manotoc dagiti mangimatmaton kadagiti pribado a kompania nga ikansela ti trabaho dagiti agpapaay kadakuada tapno maprotektaran dagiti agserserbi nga empleadoda.
Kabayatanna, basar iti kaudian a sasaaden ti panawen, naibayog iti pagsenyalan numero dos iti amianan a paset ti Ilocos Norte pakairamanan iti ili ti Pagudpud, Adams, Bangui ken Dumalneg idinto a naibayog iti pagsenyalan numero uno dagiti nabatbati a paset ti probinsia.
