LAOAG CITY – Kinondenar ni Governor Imee Marcos ti pannakatambang iti grupo ni Vice mayor Jessie Ermitanio iti ili ti Marcos ditoy probinsya nga Ilocos Norte.
Inaramid daytoy ni Marcos babaen ti panangipatulod na iti text message iti Bombo Radyo gapu ta adda iti agdama idiay Manila tapno makitaripnong ken ni Presidente Rodrigo Duterte.
Indanun pay ti gobernador ti pannakipagladingit da iti pamilya ti natay a driver ti bise mayor a ni Lucky Jesrel Rombaoa, residente iti Barangay Escoda iti nasao nga ili.
Inpetteng ti gobernador nga iti ili ti Marcos ket nalinak ken naurnus uray iti kangitingitan iti eleksyon agingga a napasamak ti pannakatambang ti grupo ti bise mayor.
Inpasigurado ti gobernador a saan nga agsardeng dagiti otoridad nga agimbestigar iti pannakatambang ti bise mayor ken mapagsungbat ti siasinno man a responsable ti napasamak.
Innayon ti gobernador a gapu ti napasamak ket namantsaanen ti napintas a rekord ti nasao nga ili.
Iti agdama, kuna ni Marcos nga agtultuloy iti imbestigasyon dagiti otoridad iti insidente.
