LAOAG CITY – Kinumpirmaran ni Fire Officer III Raymond Atud ti Bureau of Fire Protection ditoy Siudad ti Laoag nga adda manen ti narepondean a grassfire iti laud a paset ti Gilbert Bridge.
Segun ken ni Atud, dagus met laeng a nasebseban ti uram ken saanen a nagramram ti apoy iti sabali pay a direksion gapu ta insigidada a nasebseban.
Inbatadna a saan met nga asideg kadagiti pagtaengan iti nakapasamakan ti uram rason nga awan ti mabalinda a pagsaludsudan no siasino ti posible nga akin-aramid ti panaguram.
Gapu iti daytoy, nagballaag ni Fire Officer III Atud kadagiti residente a liklikan ti agaramid ti banag a makaitunda ti uram.
Innayonna a saanna met a masinunuo no ania ti mabalin a rason no apay adda manen napasamak a grassfire.
Maipalagip a saan laeng daytoy ti naimaldit a grassfire ti BFP Laoag ngem awan pay ti maaktuanda nga akin-aramid daytoy agpapan ita a gundaway.
