LAOAG CITY – Inlawlawag ni Mayor Michael Marcos Keon ditoy ciudad ti Laoag a masapol nga urayen ti pinal a rakurak ni Gov. Matthew Marcos Manotoc mainaig iti pannakaipadalan ti Modified Enhanced Community Quarantine (MECQ) ditoy ciudad ti Laoag.
Nupay kasta, kuna ti Mayor a kabayatan ti MECQ ditoy ciudad ti Laoag ket maiyuswat ti mass swabbing babaen iti naiget a panagtrabaho dagiti contact tracers tapno malpadan ti panagwaras ti covid-19.
Segun kenni Keon, idi kalman ket nagtataripnong da kadagiti amin a barangay captain ditoy ciudad tapno maamoan no anya ti mabalin nga epekto ti MECQ ken tumulong da iti pannakaisagana ti executive order ken adalen ti gobernador.
Inbatad na a gapo iti iresponsable nga statement dagiti public officials ket nag-panic dagiti tattao idi rabii ken saan da a kayat a saan a preparado dagiti amin isut gapo na a nagdesisyon da kenni Gov. Manotoc a saan a maideklara ita nga aldaw ti MECQ no diket intono bigat.
Maipalubos met kadagiti barangay nga adda ti talipapa gapo ta iti agdama ket nakarikep ti merkado publiko ditoy ciudad.
Inrakurak na pay a saan a mapalubusan dagiti tattao a taga sabali nga ili a sumrek ditoy ciudad, ken dagiti entry ken exit point partikular iti ili ti Sarrat, San Nicolas ken Bacarra ket adda ti maestablisar a checkpoint wenno mabarikkadaan.
Inpasigurado na nga ado ti ma-augment a kameng ti PNP tapno tumulong, idinto a dagiti dumalan laeng ditoy ciudad ti Laoag ket masapol a magna iti bypass road gapo ta naiget a maipawil ti magna iti sentro ti ciudad.
Kunana a maawatan na dagiti arungaing wenno reklamo dagiti tattao ngem inpetteng na nga awan ti mabalinan da gapo ta masapol a masalakniban ti salun-at dagiti residente.
Awan met ti mapalubusan kadagiti pasdek panganan nga agpa-dine in no diket take out amin idinto a ti transportasyon ket awan pay ti pinal a desisyon na ngem iti ummuna a gundaway ket napagtutulagan a maysa laeng ti mabalin nga aglugan iti tricycle ken saan a mabalin ti panagkalubbon iti motorsiklo, ngem kunana a mabalin pay nga agbaliw daytoy.
Amin met a rumwar iti barangay da ket masapol nga addaan ti pass slip ken maysa laeng iti kada pamilya ti mapalubusan.
Immapela met ti Mayor ti kooperasyon ken pannakaawat dagiti tattao iti sitwasyon ken masapol nga agsagana dagiti taga ciudad ti Laoag.
Mainaig iti daytoy, kinumpirmaran pay ni Mayor Keon nga iti agdama ket adda iti kritikal a kasasaad ti maysa kadagiti nagpositibo ngem sumaysayaaten ti kondisyon na.
