LAOAG CITY – Inruaren ti Hamas ti nagan dagiti sumaruno nga hostage a waya-wayaanda.
Nabigbig dagitoy nga isuda Eli Sharabi, agtawen ti 52-; Ohad Ben Ami, agtawen ti 56 ken Or Levy , agtawen ti 34.
Kasukat daytoy ti nasao a bilang ti 183 Palestinian prisoners nga iggem met ti Israel.
Sipod a naipatungpal ti ceasefire idi Enero 19 ket addan ti 18 hostages ti winaya-wayaan ti Hamas idinto nga iti Israel ket adda ti 383 a Palestinian prisoners ti pinaruk-atandan.
Iti uneg ti tallo a lawas sakbay a nalpas ti umuna a yugto ti ceasefire ket waya-wayaan ti Hamas ti 33 nga hostage ken 1,900 a balod.
Inbatad ti Israel a walo kadagiti 33 nga hostage ket pimmusayen.
Maipalagip a sipod idi nangrugi ti panangraot ti Hamas iti Israel idi Oktubre 7, 2023 ket addan ti 251 nga hostage ti iggemda ket adda ti 1,200 ti natay.
Naammoan a dumanon iti 47,500 a Palestino ti napatay ti Israel iti inwayatda nga opensiba iti Gaza.
Immunan nga inbatad ti opisina ni Israeli Prime Minister Benjamin Netanyahu a naawatdan ti listaan dagiti hostage a waya-wayaanda no sadinno a napakaammoan metten dagiti maseknan dagitoy a pamilia.
