LAOAG CITY – Inpasigurado ni Mr. Mark Francis Salvatierra, OIC ken Head Inspection ti Provincial Quarry Office a saan a palsipikado ti pirma iti dokumento seknan iti permit ti 7 Colors Multi-purpose Cooperative ti Brgy. Caruan iti ili a Pasuquin.
Segun kenni Salvatierra, nakasagana a mangpaneknek iti daytoy kalpasan a nairaman ti nagan na iti manarimaan nga hearing iti Sang. Panlalawigan seknan iti daytoy.
Ummuna iti daytoy, inbatad ni Sang. Panlalawigan Member Atty. Davinci Crisostomo a basar kenni Mr. Ronnie Recta, presidente ti 7 Colors ket saan a nagpirma.
Nupay kasta, inpetteng na nga idi napirma ni Recta iti nasao a dokumento ket inimatangan ti dua a witness, ken nanotaryaan pay babaen kenni Atty. Hermie Labayog.
Kunana a no saan a pudno ti ibagbaga na ken mapaneknekan daytoy ket nakasagana a bumaba iti pwesto na.
Namunganay daytoy nga isyu iti pannakadesgrasya ti maysa a truck a nagkarga ti pebbles idi bulan ti Mayo iti laksid a ti nakaikabil iti tarpualin ket animal feeds.
Maipalagip nga idi bulan ti Mayo ket nakadungpar ti truck ti nakamotorsiklo ken ditoy a naduktalan nga awan ti permit nga agibyahe ti maseknan ti pebbles.
Naamoan a ti kabigatan na ket naiyakar dagiti pebbles iti sabali a truck ngem saan pay a napalus-pusan ti truck gapo iti permit ngem apaman nga adda ti naipakita ti driver ket napalubusan met laeng a dagus.
Kuna ni Salvatierra a sakbay da nga i-release ti truck ket nagdadanon da iti hepe ti San Nicolas, pannakabagi ti ENRO ken Office of the Barangay Affairs ken napagsasaritaan daytoy ken tinawagan na pay a mismo ti 7 Colors.
Inlawlawag ni Salvatierra nga iti pannakisarita na iti 7 Colors ket naamoan na nga adda ti inted ti kooperatiba a permit ken nabagaan pa dagitoy a mangaramid ti affidavit.
Inbatad na a daytoy ti nagibasaran no apay a napaluspusan met laeng ti truck ken immapela pay kadagiti mangibagbaga nga awan ti dokumento a paneknekan da daytoy.
Mainaig iti daytoy, kuna ni Salvatierra a sakbay ti panagbyahe ti truck ket adda ti napan iti Quarry Office a pannakabagi ti 7 Colors ken in-refer na pay kenni Mr. Perry Martinez iti Ilocos Norte Metro Council.
Kabayatanna, inpetteng ni Salvatierra a saan na nga inlemmeng ti resolution nga inted kenkuana ni Barangay Chairman George Ragunjan iti Barangay Caruan iti ili ti Pasuquin.
Sungbat daytoy ni Salvatierra iti akusasyon a saan na nga inpaima iti Sang. Panlalawigan ti barangay resolution seknan iti permit.
Inlawlawag na nga idi Mayo 24, 2019 ket naipa-recieve na iti kapitolyo probinsyal ti dokumento ken naka-address pay kenni Sen. Imee Marcos nga isu ti dati a gobernador ditoy probinsya.
Mainaig iti daytoy, kuna ni Salvatierra nga idi Disyembre 31, 2017 ket nag-expire ti permit ti kooperatiba ngem idi Nobyembre 6, 2019 ket naikkan manen ken napirmaan ti permit.
Inlawlawag na a sakbay a naited ti permit idi Nobyembre 11, 2019 ket adda ti naiyuswat a meeting iti Nobyembre 8 iti dayta met laeng a tawen nga inatendaran dagiti miembro ken opisyales ti kooperatiba, dua a konsehal ken ni Barangay Chairman Ragunjan.
Kunana a kabayatan iti taripnong ket nasaludsod na iti maysa a konsehal iti daytoy ngem insungbat ti opisyal nga awan ti ammo na iti dokumento isut gapo na a ni laeng Ragunjan ken ti Barangay Secretary ti nagpirma.
Inbatad pay ni Salvatierra a naibaga na idi kadagiti miembro nga addan ti permit ngem saan na a masungbatan no apay a saan a kayat nga i-release ti barangay.
Gapo iti daytoy, kuna na nga adda manen ti naiyuswat a taripnong ket naimbitaran ni Ragunjan ngem saan a nagparang tapno kuma mailawlawag no anya ti rason no apay a saan na nga i-release ti permit ti kooperatiba.
Nupay kasta, kuna na a ti inaramid ni Ragunjan ket nagsurat iti Sang. Panglalawigan a nakaipalaonan ti panangkwestyun na iti validity ti permit.
