LAOAG CITY – Nagballaag dagiti health experts a dakdakkel ti posibilidad na a ngumato ti blood sugar dagiti indibidual aglalo dagiti addaan ti diabete iti panawen ti kalgaw.
Basar kadagiti doktor, ti nangato a temperatura ket makaapektar iti kabaelan ti bagi a mangkontrol ti glucose levels.
Inlawlawag da a no nakaro ti kinabara ti temperatura ket al-alisto a ma-dehydrate ti maysa a tao, nga agbalin a rason ti panagngato ti blood sugar gapu ta ad-adda a pumalet ti dara ken saan nga epektibo ti panagusar ti insulin.
Innayo dagiti eksperto a dagiti panagbalbaliw iti routine iti panawen ti kalgaw kas ti panaginom ti nasasam-it a mainom ken dadduma pay nga high-sugar foods ket mangnayun iti risgo ti hyperglycemia.
Gapu iti daytoy, inbalakad dagiti eksperto nga ugalien ti uminom ti umdas a danom, liklikan ti sobra a nasasam-it a makan ken regular nga imonitor ti blood sugar levels.
Napateg met nga agtalinaed iti nalamiis a lugar ken liklikan ti nabayag a panagbilag iti kapudutan.
