LAOAG CITY – Nagdesision ti House Committee on Justice a saan a lukatan ti naka-selyado a karton manipud iti Bureau of Internal Revenue a naglaon ti income tax returns ni Vice President Sara Duterte ken ti asawa daytoy a ni Atty. Manases Carpio.
Kimmontra ti 38 a kongresista a miembro ti komite a lukatan ti karton ken 6 ti nagkalikagum a lukatan idinto nga awan ti nag-abstain iti panagbutos.
Sakbay ti panagbubutos ket nangipeksa ti agsupadi a takder dagiti committee members maipanggep iti daytoy.
Inpetteng da Representatives Leila De Lima, Lorenz Defensor, Jude Acidre Antonio Tinio, Sara Jane Elago ken Renee Co, lukatan ti karton tapno maibutaktak dagiti impormasion wenno ebidensia nga adda ti pakainaiganna kadagiti alegasion a nakaipalaon iti impeachment complaint kontra ken ni Vice President Sara.
Kunada a ti panaglukat ti karton ket maiyallubog iti pammilin ti Kamara de Representantes nga ilungalong ti panagsungbat ken ibutaktak ti kinapudno.
Kontra met a lukatan ti karton manipud iti Bureau of Internal Revenue da Representatives Benny Abante, Joel Chua, Janette Garin, David Pascual, Brian Poe, Ann Matibag, Jay jay Suarez, Janice Degamo, Lordan Suan ken Chel Diokno.
Para kadagiti nasao a kongresista ket nasaysayaat laengen nga ipaima daytoy iti Senate Impeachment Court iti panaglukat ti nadakamat a karton.
Innayonda a nasken nga agbalin a naannadda aglalo ket adda ti dakdakamaten ti Bureau of Internal Revenue a linteg no apay a saan a basta a mabalin nga ipublikar ti impormasion mainaig kadagiti taxpayers.
