LAOAG CITY – Kinondenar dagiti lider ti House Quad Committee (QuadComm) ti panagdengeg ti Senate blue ribbon subcommittee gapu iti panangipabus-oy da ken ni dati a President Rodrigo Duterte nga agusar kadagiti saan a maiyannatop a sasao kabayatan ti imbestigasyon iti war on drugs idi administrasyon na.
Segun ken Laguna Representative Dan Fernandez, nakababain ti napasamak iti senate hearing gapu ta ti legislative records ket paset ti pakasaritaan ken maysa daytoy nga isyu a rumbeng a maseryoso.
Kinuna met ni Manila Representative Bienvenido Abante, ti kinabulgar ni dati a Presidente Duterte bayat ti hearing ket saan nga ugali ti maysa a lider.
Innayonna nga ad-adda a makariribuk ti konteksto dagiti insasaona ta mangipasimudaag laeng daytoy nga awan pakaseknan na iti pammapatay iti sidong ti drug war-na.
Maipalagip nga inbatad ni Sen. Risa Hontiveros ken Senate President Francis Escudero a saan koma a paset ti aniaman a proseso ti panaglunod nangruna no kabayatan ti imbestigasyon.
Iti agdama ket awan pay ti komento ni Senate Minority Leader Aquilino “Koko” Pimentel III kadagiti inbutaktak dagiti lider ti QuadComm.
