Inwaragawag ni Presidente Ferdinand “Bongbong” Marcos Jr. ti Hulio 17 kas “National Cardiopulmonary Resuscitation Day” kas paset ti panangitandudo iti national health awareness campaign iti tunggal pamilia a Pilipino.
Iti Proclamation No. 511 a pinirmaan ni Presidente Marcos, ti cardiopulmonary resuscitation (CPR) ket maysa a teknik a mangsalaknib iti biag a mabalin nga usaren kadagiti emerhensia a kasasaad kas iti atake ti puso ken pannakalmes.
Segun iti presidente, napateg a maitandudo ti health consciousness dagiti Pilipino babaen ti panangipaay iti kasapulan nga impormasyon ken paglaingan a mangsungbat kadagiti emerhensia a kasasaad.
Iti babaen ti proklamasion, mandato ti Department of Health (DOH) a mangidaulo iti tinawen a selebrasion ti National Cardiopulmonary Resuscitation Day.
Kabayatanna, maiparparegta met dagiti ahensia ti gobierno, non-government organizations, ken pribado a sektor a makiraman iti daytoy a selebrasion.
