LAOAG CITY – Umaboten iti 338 ti designated Human Immunodeficiency Virus care facilities ti Department of Health (DOH) iti intero a pagilian.
Basar iti departamento, dagiti nasao a pasilidad ket mabalin a mangipaay ti libre nga HIV services kas maiyataday iti pammilin ni Presidente Ferdinand Bongbong Marcos Jr.
Gagem daytoy a patalgeden ti HIV Prevention ken suporta para kadagiti tattao nga addaan ti Human Immune deficiency Virus wenno HIV.
Kadagiti nasao a pasilidad ket libre a maipapaay dagiti sumaganad:
* HIV screening ken confirmatory testing;
* Antiretroviral therapy ken counseling;
* HIV combination prevention methods kas ti condom, lubricant, pre-exposure prophylaxis wenno PREP
* Viral load testing a kasapulan dagiti People Living with HIV nga agdama nga agtumtumar ti agas a mangipababa ti viral load da tapno saan da a maiyakar ti virus.
Inpakaammo ti Department of Health nga adda ti Outpatient HIV AIDS Treatment (OHAT) Package ti Philippine Health Insurance Corporation wenno PhilHealth nga umaboten ti 58,500 a pisos iti tunggal pasyente iti kada tawen.
Nagpalagip ti DOH nga agturong kadagiti DOH-HIV care facilities para iti libre nga HIV screening ken testing gapu ta adda ti available a serbisyo aniaman ti resulta.
