LAOAG CITY – Inbatad ni Dr. Rogelio Balbag, Executive Director ti Ilocos Norte Hospital and Management Council ditoy probinsya nga iwalin koman ti kadaanan a kannawidan no makagat ti aso kas ti panagpasuma ken ti panagusar ti tandok.

Inbalakad ni Balbag a no makagat ti maysa a tao ti aso ket ti kasayaatan nga aramiden ket mapan agpatudok ti bakuna kontra iti rabies.

Inpetteng na nga adda da paylaeng dagiti saan pulos a mapan agpakita iti ospital no di ket umayen ti papanda panagpasuma.

Mainaig iti daytoy, kuna ni Balbag a no makagat ti aso kangrunaan na dagiti maatap nga adda ti rabies na ket masapol a saan a partien ken sidaen ti nasao a dingwen.

Inpetteng na a ti kasayaatan nga aramiden ket maputed ti ulo ti aso a kimmagat ken mapan paeksamen iti Veterinary Laboratory idiay Pangasinan tapno isu ti mangkumpirmar no addaan ti rabies wenno awan.

Kabayatanna, kinumpirmaran ni Balbag a naibusen ti human rabies vaccine nga inpaay ti Department of Health ditoy probinsya gapu ti kaado dagiti nakagat ti aso a napan nagpabakuna.

Inpalgak na a gimmatang ti probinsya ti nasao a bakuna ngem adda latta ti panagkurang na rason nga agkidkiddaw da manen iti Department of Health.

Innayon na a pinatgan pay ni Governor Matthew Marcos-Manotoc ti kiddaw da a mangala da iti dadduma a pondo manipod iti calamity fund ti probinsya tapno adda iti nayun ti igatang da ti bakuna.

Immunan nga inbatad ni Balbag nga iti napalabas a 10 a tawen ket awan ti nairekord a pimmusay ditoy probinsya gapu iti rabies isut gapuna a maideklarar koman ti Ilocos Norte kas rabies free province, ngem isu metten ti kaadda dagiti nagpositibo ti sakit.

Maipalagip nga Naideklara ti rabies outbreak ditoy probinsya nga Ilcoos Norte kalpasan nga agtultuloy a ngumatngato ti kaso dagiti aso a positibo iti rabies.

Segun kenni Dr. Loida Valenzuela, ti provincial veterinarian nga iti agdama ada iti 53 a barangay ti positibo ti rabies nu sadinno a kaaduan ket manipod iti ciudad ti Batac ken iti ili ti Paoay.

Malaksid iti daytoy, inpakaamo na nga addan ti innem nga indibidwal ti pimmusay gapu iti rabies ken iti kaudian ket manipod iti ili ti Badoc.

Kuna ti provincial veterinarian nga indeklara da iti outbreak ti probinsiya tapno gutiguten dagiti amin nga indibidwal nangnangruna dagiti local government officials nga agaramid ti addang tapno

tulungan iti provincial government a solusyonan ti problema iti rabies.