LAOAG CITY – Inrakurak ti National Weather Service idiay Hawaii nga adda ti main-inaw ken umas-asideg nga hurricane iti akindaya a paset ti Hawaii.
Daytoy ti inbatad ni Bombo International Correspondent Manny Pascua idiay Hawaii.
Nupay kasta, kuna ni Pascua a nagbalinen a tropical dperession ti Hurricane Lane ngem nangibati ti dakkel a perdisyon iti nasao nga isla.
Inbatad a patta-pattaen dagiti Central Pacific Hurricane Forecasters a mangitunda pay laeng ni Lane ti napigsa a tudo idiay Big Island.
Nagballaag met ti Hawaii Health Department kadagiti residente idiay Big Island a liklikan da ti umasideg iti igid dagiti waig ken ti tumapog kadagiti nalibeg a danom saan a mairisgo ti biag da.
Kabayatanna, umabot ti 22 a balay ken 30 a lugan ti nauram gapo iti napasamak a brushfire iti akin laud a paset ti Maui wenno iti maaw-awagan a Lahaina.
Linaot ti uram ti agarop 2,000 acres ken nadegdegan ti uram ti napigsa nga angin gapo iti Hurricane Lane.
