LAOAG CITY – Plano ti Ilocos Norte Youth Development Office nga igiddan ti Sirib Awards iti “I Love Ilocos Norte Concert” intono Pebrero katorse a kaaldawan dagiti puso wenno Valentines Day.
Segun ken ni Mr. Weenter Ventura, executive director ti INYDO, ti nasao nga aktibidad ket paset pay laeng iti selebrasyon ti anibersario ti Ilocos Norte ti pannakaipaay ti pammigbig kadagiti kaprobinsiaan a nakaipaay ti pakaidaydayawan ti probinsia.
Inbunannagna a ti pannakaisaysayangkat ti Sirib Awards ket naisaguday iti ordinansa a napanday idi tawen 2010.
Kunana a manamnama a babaen iti daytoy ket ad-adda pay a magutigot dagiti agtutubo nga agaramid iti pagimbagan dagiti agtutubo nga Ilocano.
Inlawlawagna a nangrugin ti opisina da a nagawat ti nominasyon para kadagiti maipaayan ti pammigbig.
Imbatadna a saan laeng a dagiti nakagun-ud ti medalia iti national ken international nga agtawen ti pito agingga iti 30 ditoy Ilocos Norte ti mabalin a mainuminar ngem uray pay dagiti immawat ti “outstanding awards” iti ruar ti probinsia.
