LAOAG CITY – Ginutigot ti International Criminal Court (ICC) dagiti kameng ti Philippine National Police ken dadduma pay a law enforcement agencies a posible nga adda ti direkta nga ammona iti kaso nga agtestigo kontra ken ni dati a Presidente Rodrigo Duterte.
Ti apela ti International Criminal Court Office of the Prosecutor (OTP) para kadagiti saksi ket nairuar sumagmamano a bulan kalpasan ti panangibutaktak ni Ombudsman Jesus Crispin Remulla ti maipagarup a warrant of arrest kontra ken ni Sen. Ronald “Bato” dela Rosa a nagbalin nga Hepe ti Philippine National Police idi panawen ni Duterte.
Iti baet ti rakurak ni Remulla ket awan pay ti rimmuar a kopya ti maibagbaga a warrant of arrest ken nagbalin a rason daytoy tapno saanen nga agpakita iti Senado ni Dela Rosa.
Nangiparuk-at ti International Criminal Court ti online form no sadinno a mabalin nga agisubmitir dagiti saksi kadagiti reklamo dagitoy.
Maipalagip nga idi Marso 11, 2025 ket naarestar ni Duterte iti Ninoy Aquino International Airport ken inkabilda iti Villamor Air Base ken inturongda idiay The Hague.
