LAOAG CITY – Manamnama a mangiruar ti International Criminal Court (ICC) ti desisyon no addan ti umdas nga ebidensia tapno mangipaulog kadagiti arrest warrant kontra ken ni Israeli Prime Minister Benjamin Netanyahu ken ti lider ti Hamas idiay Gaza a ni Yahya Sinwar.
Daytoy ket kalpasan ti rekomendasion ti chief prosecutor ti International Criminal Court (ICC) a ni Karim Khan KC nga adda umdas nga ebidensia ti krimen iti gubat nga inaramid ti agsumbangir a partido.
Karaman kadagiti inlanad na a rumbeng a maarestar ket ti defence minister ti Israel a ni Yoav Gallant ken ti lider ti politika ti Hamas a ni Ismail Haniyeh.
Mainiag iti daytoy ket ibilang ni Netanyahu a makapaupay ti inrakurak ti International Criminal Court gapu ta inyarigda ti Israel kadagiti saan a napintas nga aramid ti Hamas.
Inbatad met ti lider ti Hamas a ti warrant of arrest ket saan a para kadakuada no di ket para ken Netanyahu gapu ta adu a sibilian ti napapatay iti panangrautda idiay Gaza.
Maipalagip nga inwaragawag ti chief prosecutor International Criminal Court a nakasarak iti umdas nga ebidensia a rumbeng a maarestar da Netanyahu ken dagiti Hamas gapu kadagiti krimen nga inaramidda.
