Namakdaar ti International Criminal Court (ICC) maibusor iti aniaman a pangta ken pammutbuteng iti tengnga dagiti naipadamag a pakaseknan ti Israel no mangipaulog ti tribunal iti arrest warrant a mainaig iti gubat ti Gaza.
Saan a dinakamat ti International Criminal Court no ti komentona ket mainaig iti agtultuloy nga imbestigasionna kadagiti posible a krimen iti gubat babaen ti Israel wenno ti Palestinian group a Hamas idiay Gaza ken West Bank.
Segun iti opisina ni International Criminal Court chief prosecutor Karim Khan a ti international ket addaan iti independence ken impartiality ken no ti pangta dagiti indibidual nga agibales iti korte wenno kontra kadagiti court personnel uray no saan a naaramid, mabalin a maysa a basol maibusor iti administrasion ti Justice of ti International Criminal Court ngarud pinakdaar ken inapelarna ti pannakaisardeng dagiti kasta nga aktibidad.
Nagkedked ni Khan a mangibaga no siasino ti naggapuan dagiti kasta a pangta.
Maibatay iti report ti media ti US ken Israel, posible a mangipaulog ti piskal ti International Criminal Court iti arrest warrant kontra kadagiti politiko ti Israel a pakairamanan da Prime Minister Benjamin Netanyahu ken dagiti lider ti Hamas.
Immuna a kinuna ni Prime Minister Netanyahu idi Mierkoles iti online account-na nga ikonsiderar ti International Criminal Court ti mangipaulog iti warrat of arrest kontra iti senior Israeli government ken military official kas war criminals.
Naipadamag pay a pinakdaaran ti Israel ti US nga aramidenda dagiti addang a panagibales maibusor iti Palestinian Authority a mabalin a mangiturong iti pannakatnagna no mangipaulog ti International Criminal Court iti arrest warrant maibusor kadakuada.
Nupay kasta, segun ken Gabriele Chlevickaite, managsirarak iti Asser Institute for international law a nakabase idiay Hague, saan a ti International Criminal Court wenno ti Office of the Prosecutor ti puntiria dagiti naipadamag nga addang ti Israel a mangibales.
Maipalagip a ti International Criminal Court ket nangirugi ti imbestigasion idi 2021 kontra iti Israel, Hamas ken dadduma pay nga armado a grupo ti Palestinian para kadagiti posible a krimen ti gubat kadagiti nasakupan a teritorio ti Palestina.
