LAOAG CITY – Ti umas-asideg a panangusig ken ni dati a Presidente Rodrigo Roa Duterte iti International Criminal Court (ICC) ket mangipaay kadagiti biktima ti war on drugs ti umuna nga opisial a legal a venue tapno iyistoria dagiti padas dagitoy iti maysa a korte nga addaan ti bileg a mangipataw ti pannusa ken mangprotehir kadagiti testigo.
Daytoy ti inrakurak ni Atty. Dino de Leon, convenor ti Team Pinas.
Inbatad ni Atty. De Leon a tuloy ti proseso iti baet kadagiti addang ti kampo ni Duterte a maitantan ti kaso iti babaen ti panagsukat ti abugado ken panangatake iti kredibilidad ti korte.
Inlawlawag ni De Leon nga agduma ti International Criminal Court trial iti “private truth commission” nga idadauloan ni dati nga International Criminal Court Judge Raul Pangalangan.
Ti komision ket maysa a pribado nga inisyatiba laeng tapno matulungan a makapagsarita dagiti biktima idinto a ti International Criminal Courtay ket maysa nga opisial a korte nga addaan ti bileg a mangipaay ti seguridad ken hustisia.
Kunana nga ipapakissay ti International Criminal Court ti sumurok 120 a nakairekord a panagbitla ni Duterte nga insubmitir nga ebidensia ti naranggas a retorikana.
