LAOAG CITY – Mamati ni Independent Commission for Infrastructure Executive Director Atty. Brian Hosaka a makaipila ti kaso ti komision sakbay nga agngudo ti tawen.
Iti baet a baro pay laeng ti pannakabukel ti komision ken karugrugi pay laeng daytoy iti trabaho, patien ni Hosaka nga adda iti umiso a direksion ti Independent Commission for Infrastructure kadagiti maiwaywayat nga imbestigasion ken panagdengngeg.
Iti agdama, kunana a dakkel a karit ti limitado a bilang ti staff gapu ta ti komision ket bukbuklen laeng ti maysa a chairman ken dua a commissioner a mangisaysayangkat ti agsasaruno a panagdengngeg.
Inlawlawagna a ti limitado a bilang ket sumangsango iti maysa a ‘well-oiled machine’ a bukbuklen dagiti karaman iti flood control scandal kas kadagiti contractor, government officials ken dadduma pay a karaman a nangangato nga opisial.
Nupay kasta, inpasigurado ni Hosaka a mangmangngeg ti komision ti arungaing ken ikkis ti publiko kontra iti naibutaktak a korapsion ken ti panagkalikagum dagitoy nga ipasango iti linteg dagiti amin a responsable.
Inbatadna a kalikagum ti komision a maaddaan ti napaspas a panangtingiting kadagiti kaso ti korapsion ngem masapul latta nga ipadalan ti amin iti legal a proseso tapno masigurado a solido ti ipasango a reklamo kontra kadagiti responsable iti korapsion.
Innayonna a gagem ti komision a dagiti karaman a personalidad ket nasken a mapagsungbat dagitoy iti kabiitan a panawen.
