LAOAG CITY – Naiget ti kalikagum ti Provincial Government of Ilocos Norte a mapagbalin ti probinsia nga “investment destination”
Segun ken ni Ms. Rona Leigh Bueno, mangidadaulo ti Invest Office ti gobierno probinsial daytoy ti kangrunaan a rason nga agtultuloy ti panagawisda kadagiti agpupuunan nga umay mangipasdek ti negosio ditoy probinsia ken mangitandudu iti Ilocos Norte a napintas a pangiyestablisaran ti negosio.
Mainaig iti daytoy, inbatadna nga agtultuloy ti panangtulongda kadagiti naawisda nga agnegosio ditoy probinsia ken agawis pay ti opisinada ti ad-adu pay nga umay mangiyestablisar ti negosio ditoy probinsia.
Mangnamnama nga iti panangkalikagum ti Gobierno Probinsial nga agallukuy kadagiti “investors” wenno agpupuunan ket magutigot ti ad-adu pay nga “investors” a mangipasdek ti negosio iti bukud a lugar.
Kagiddan daytoy, nagpanawagan kadagiti kakailian nga addaan iti nakatiwangwang a daga wenno pasdek a saan a maus-usar a mangipalista kadagitoy iti opisinada.
Inlawlawagna a dagitoy ti masansan a birbiruken dagiti agpupuunan nga interesado a mangiyestablisar ti negosioda ditoy Ilocos Norte.
Innayonna a mabalin a maidiaya a mapaupaan wenno mailako kadagiti maseknan a negosiante.
