LAOAG CITY – Impadanon ni Gob. Matthew Marcos Manotoc ti pannakipagladingit ti Ilocos Norte iti Batanes a nagpasar ti nakana a didigra a ginubuay ti napigsa a gingined a nangdayyeg iti nadakamat a probinsia.
Segun iti gobernador, mangipaay ti Ilocos Norte iti lima gasut a ribu a pisos a tulong iti nadakamat a probinsia.
Imbatadna a rumbeng laeng a mangipaay ti probinsia ti tulong gapu ta ti Batanes ket paset pay laeng ti “solid north”.
Malaksid iti daytoy, inbunannag ti gobernador a nagkokoordinardan kadagiti padana a gobernador para iti pannakaipaay ti tulong idiay Batanes.
Kuna ni Manotoc a ti Ilocos Norte ti mangiyurnos kadagiti eroplano nga agkarga ti tulong nga agluas iti Laoag International Airport.
Nagpanawagan pay ti gobernador kadagiti umili ditoy probinsia a mangikarkararag para iti alisto nga ibabangon ti nasao a probinsia pakairamanan dagiti umili nangnangruna kadagiti napakaroan a nadidigraan.
