LAOAG CITY – Namnamaen dagiti sumagmamano a Senador nga ag-convene ti impeachment court iti panaglukat ti sesyon iti 20th Congress inton Hulio 29.
Inbatad ni Senador Tito Sotto, mangnamnama daytoy nga asinoman nga agtugaw kas Senate President ket agpaayab ti sesyon ti impeachment court ken nasken a maidatag nga insigida ti articles of impeachment tapno maipaayan ti gundaway ti prosekusion ken depensa a maiprisentar dagiti takderda.
Naammoan a no nadanonen ti Hulio 29 ken saan pay a nagtungpal ti Kamara iti maikadua a pammilin ti impeachment court, agpanawagan ni Sotto a mangikeddeng ti iskedyul tapno ag-convene ti korte ken tapno marugianen ti impeachment trial.
Mangnamnama met ni Senador Risa Hontiveros ti insigida a panag-convene ti impeachment court ken ti insigida a panangtingiting iti impeachment case kontra ken ni Vice President Sara Duterte.
Kiniddaw ni Hontiveros ti insigida a panagsapata kadagiti baro a senator-judges nangruna ita nga aldaw ket epektibon ti panangrugi ti 20th Congress.
Inpetteng ti agpanpanday linteg a saan a mabalin nga adda ti ag-mosyon laeng nga ibasura ti impeachment case a saan man laeng a dimmalan iti panangtingiting ken napateg a maidatag nga umuna dagiti amin nga ebidensia ken mapagsaritaan ti nagbalin a sungbat ti depensa ken prosekusion iti nagbalin a summon ti korte.
