LAOAG CITY – Inrakurak ni Senador Erwin Tulfo a target a mangrugi inton Hulio 6 ti impeachment trial ni Vice President Sara Duterte kalpasan a napagsaritaan daytoy iti caucus dagiti senador.
Inbatad ni Tulfo nga inprisentaren ni Senate President Alan Peter Cayetano ti mailunglungalong nga schedule no sadinno a mangisayangkat nga umuna ti regular session ti Senado iti bigat sakbay nga ituloy ti impeachment proceedings tunggal malem manipud Lunes agingga Mierkoles.
Kabayatanna, kinontra ni Tulfo ti singasing ni Senador Rodante Marcoleta a palubosan a makabutos ni Senador Ronald “Bato” Dela Rosa iti impeachment proceedings uray saan daytoy a pisikal a makaatendar.
Inpettengna a masapul a personal a present ti maysa a senador tapno makipaset iti proseso.
Maipalagip a manarimaan a sumangsango ni Dela Rosa mainaig iti International Criminal Court arrest warrant kalpasan nga inbasura ti Korte Suprema ti kiddawna a Temporary Restraining Order (TRO).
Kuna ni Tulfo nga iyur-uray pay laeng dagiti senador ti agbalin a direksion ti Senate leadership maipanggep iti nasao a banag.
