LAOAG CITY – Nagpanawagan ni Department of the Interior and Local Government Secretary Jonvic Remulla kadagiti agpanpanday linteg nga amendaran ti Implementing Rules and Regulations ti gun ownership iti pagilian.
Daytoy ket tapno papigsaen ti panangipatungpal ti linteg ken maipagarup a nalawag a pagsungsungbatan wenno criminal liability ti mismo nga akinkukua ti paltog nga inusar ti sabali a tao iti panagaramid ti krimen.
Inbatadna a kas iti napasamak nga insidente ti pammaltog iti uneg ti maysa a pagadalan idiay Tacloban City no sadinno a ti mismo nga akinkukua ti paltog nga inusar iti krimen ket sumango laeng iti kaso a malversation ken administratibo.
Nupay kasta, inlawlawagna a saanda a mapilaan ti criminal liability gapu ta saan a karaman ti akinkukua ti paltog no usaren daytoy ti sabali a tao iti panagaramid ti krimen basar iti saan a maiyannatop a linteg a maipatpatungpal ditoy pagilian.
Kabayatanna, kuna ni Remulla a nasken a saan laeng a nakapokus iti tawen dagiti agtutubo ti panangamendar ti nasao a linteg no diket masapul a karaman ti pannakaawat ken kalikagum ti agtutubo iti krimen.
