LAOAG CITY – Intudo ti grupo a United Broiler Raisers Association (UBRA) ti panagangkat iti karne ti manok ti kangrunaan a rason iti agdama a kasasaad ti industria ti manok iti pagilian.
Iti statement ni United Broiler Raisers Association Chairman Gregorio San Diego, nga adu a mannalon ti napilitan a mangkissay wenno manglimitar iti kaadu dagiti nataraken a manok.
Innayonna nga adu kadagiti maseknan ti napilitan a mangisardeng iti produksionda tapno maliklikan ti ad-adu pay a pannakapukaw.
Kinunana a daytoy ket gapu met iti nalabes a panagangkat dagiti imported frozen chicken meat kadagiti merkado a sipud idi Oktubre 2023 agingga ita nga Abril 2024.
Kabayatanna, nagballaag ti Department of Agriculture a maipapan iti nangato a presio iti karne ti manok.
