LAOAG CITY – Inrakurak ni United States President-elect Donald Trump a ti inagurasionna ket maiyuswat iti uneg ti United States Capitol Washington, DC nga imbes nga iti tradisional iti ruar gapu iti manamnama a nakaro a nalamiis a paniempo.
Daytoy a desision ket nagbalin a pakasaritaan iti uneg ti 40 a tawen nga inyakar iti seremonia iti uneg.
Inlawlawag ni Trump a saanna a kayat nga adda ti mairisgo kadagiti agatendar gapu iti nakaro a lamiis iti pagilianda.
Manamnama nga ad-adda pay a lumamiis ti temperatura idiay Estados Unidos gapu iti mapaspasaran a wind chill a mangpababa iti marikrikna a panawen a posible pay a dumanon iti freezing point.
Idi 1985 ket ginandat met ni Former President Ronald Reagan nga iyakar iti uneg ti inagurasionna gapu iti kapada a rason a nalamiis a panawen. Iti dayta a gundaway, naipadamag a ti wind chill ket bimmagsak iti -10 agingga iti -20 degrees Fahrenheit.
Naammoan a naiyakar pay ti parada ni Trump iti Capital One Arena, maysa nga Sports Stadium iti downtown Washington. Saan met a nalawag no kasano a maiwayat ti parada iti uneg ti arena ngem plano ni Trump a makikadua kadagiti tattao iti lugar kalpasan ti panagsapatana.
