LAOAG CITY – Mangnamnama ni Ilocos Norte Electric Cooperative General Manager Perry Martinez nga agtultuloy ti panagbaba ti presio ti kuryente nangruna ket nagsardeng metten ti gubat iti Middle East a mangap-apektar iti panaggaraw ti presio.
Inbatadna a kababaan ti “residential electricity rate” iti intero a Luzon ti Ilocos Norte Electric Cooperative ken maika-17 a kababaan kadagupan dagiti amin a “distribution utilities” iti sapasap a pagilian.
Inlawlawagna a daytoy ti rason a binigbig manen ti Department of Energy ti Ilocos Norte Electric Cooperative a maysa kadagiti “top distribution utilities” nga addaan ti kababaan ti “residential electricity rate” iti napalabas a bulan ti Mayo.
Kunana a ti kaipapanan daytoy a tallon a bulan a diretso a karaman ti Ilocos Norte Electric Cooperative kadagiti bigbigbigen ti Department of Energy nga addaan ti kababaan ti “residential electricity rate” iti pagilian.
Inpetteng ni Martinez a kaipapanan ti sumaysayaat a situasion ti Ilocos Norte Electric Cooperative ti kinapursigido ti kooperatiba a mangpatalinaed iti kinababa ti “rate” ti elektrisidad ditoy probinsia a kabaelan ti tunggal maysa nga Ilokano.
Naammoan a ti “residential rate” ti Ilocos Norte Electric Cooperative sakbay pay dagiti buis ken dadduma pay a masapul a mabayadan ket Php 10.1399 iti kada kilowatt hour nupay ti “actual residential electricity rate” idi bulan ti Mayo ket Php 11.2872.
