LAOAG CITY – Kalikagom ti Sang Panlalawigan a maisumitir amin dagiti listaan dagiti infrastructure projects ti Department of Public Works and Highways iti 1st ken 2nd engineering district, National Irrigation Administration ken ti Department of Agriculture iti kada quarter.
Segun kenni Bokal Saul Lazo, chairman ti Committee on Laws, ti nasao nga addang ket panangtungpal da iti kalikagom ni President Ferdinand Marcos Jr. a transparency ken good governance.
Kunana nga ado dagiti infrastructure project ditoy probinsya isut gapuna nga amin dagiti nadakamat nga ahensya ti gobierno ket masapol nga agisumitir ti listaan dagiti proyekto da.
Mainaig iti daytoy, kiniddaw ni Bokal Marlon Sales, chairman ti Committee on Public Works a ti kiddawen da a datos ket nangrugi idi 2016 agingga iti agdama.
Maipalagip nga immununan a nadakamat ni Vice Governor Matthew Marcos Manotoc a nagkiddaw da ti listaan kadagiti flood control projects iti Department of Public Works and Highways kangrunaanna dagiti nalpasen ken dagiti agdama a proyekto.
Nupay kasta, babaen ti maysa a resolusyon ket namandar dagiti maseknan nga ahensya ti gobierno nga agipasa kadagiti proyekto da iti kada kwarter.
