LAOAG CITY – Balligi a natiliw dagiti otoridad dagiti innem nga indibidual gapo iti iligal a panagsusugal da iti minatayan iti Barangay 57, Pila ditoy ciudad ti Laoag.
Segun kenni Police Lt. Col. Joseph Baltazar, ti chief of police ti Philippine National Police ditoy ciudad ti Laoag, ti trabaho dagiti innem a natiliw ket tricycle driver, mannalon ken construction worker.
Inbatad na a nakumpiskar da ti 10,298 pesos a pusta, baraha, lamisaan ken tugaw.
Kunana nga iti naiyuswat ti operasyon ket awan dagiti tanod wenno barangay officials ngem mabalin nga inrugi dagiti maseknan ti panagsugal idi awanen dagiti opisyal iti nadakamat a minatayan.
Inlawlawag na nga agtultuloy latta ti naiget a panagmonitor da tapno maisardeng ti iligal a panagsusugal nangruna ket adda dagiti agilibas a mangiyuswat iti daytoy.
Iti agdama, maisagsaganan ti maipila a kaso a panaglabsing iti PD 1602 kontra kadagiti nagsusugal.
Kabayatanna, binalakadan ni Baltazar dagiti adda ti minatay na a saan da nga ipalubos nga adda ti agsugal, ken iti publiko a saan da nga agbuteng nga agreport kadakuada.
