LAOAG CITY – Inbatad ni Mrs. Cherry Joy Garma, ti Information Officer ti Dept. of Education-Ilocos Norte a nasayaat no maibaba ti oras a panagisuro dagiti mangisursuro tapno saan da unay a marigatan.
Segun kenni Garma, saan a linged a kiddaw daytoy dagiti kaadoan tapno maalay-ayan ti trabaho da.
Nupay kasta, kuna ni Garma a nabayag metten nga innem nga oras ti panagisuro dagiti maseknan a mangisursuro kas mandato iti linteg.
Inlawlawag na a basar iti Civil Service Commission ket masapol nga agrender dagiti mangisursuro ti walo nga oras iti inalaw.
Kunana pay nga iti babaen ti Magna Carta for Public Teachers nga uray walo nga oras iti inaldaw a masapol nga irender dagiti maseknan ket nasken a saan a lumabes iti innem nga oras ti panagisuro da.
Dinakamat na pay a mandato daytoy a nailanaed iti Deped Order 921 wenno ti Guidelines for the Implementation of Civil Service Resolution for Public Teachers.
Naamoan a ti innem nga oras ket isu ti panagisuro dagiti mangisursuro iti uneg ti classroom idinto a ti dua nga oras ket para iti teaching related wenno dagiti napapateg nga aramiden dagitoy.
Mainaig iti daytoy, kuna ni Garma a no pakaseknan iti kalidad ti panangisuro, agdepende daytoy iti mangisursuro tapno saan a maapektaran dagiti ubbing.
Ummuna iti daytoy, kalikagom ni Alliance of Concerned Teachers – Philippines a maipababa iti uppat nga oras ti panagisuro dagiti public school teachers gapo ta ti imbes nga innem nga oras ket saan a makatao.
