LAOAG CITY – Nagpalagip ti Ilocos Norte Police Provincial Office (INPPO) iti saan a panagusar ti videoke kangrunaan na kadagiti lugar nga adda dagiti estudyante a dumaldalan ti online class wenno modular learning.
Inbatad ni Police Lt. Col. Randy Baoit, ti pannakangiwat ti Ilocos Norte Police Provincial Office (INPPO), nakikoordinaren kadagiti amin a chief of police iti nagduduma nga ili ken ciudad ditoy probinsya mainaig iti daytoy a banag.
Kuna na pay a masapol a kasarita dagiti chief of police dagiti opisyal ti barangay tapno isu ti katulungan na a mangsita kadagiti ag-videoke mangrugi iti lunes agingga iti biernes.
Inpetteng ni Baoit a naringgor ti videoke isut gapuna a mabalin a makaperdi daytoy ti panagadal dagiti estudyante.
Kabayatanna, inbaga met ni Pol. Lt. Col. Paul Benedict Parado, Chief ti Provincial Operation Unit ti INPPO a mismo a ti national headquarter ti nangiparuk-at ti memorandum mainaig iti daytoy nga addang.
Gapu iti daytoy, kuna ni Parado a masapol a ti chief of police ket makikoordinar iti Local Government Unit (LGU) tapno maaddaan ti ordinansa mainaig iti panagoperar ti videoke.
Innayon na a no ania ti maputar nga ordinansa iti kada LGU ket isunto met ti maipatungpal.
