LAOAG CITY – Pormalen a kiniddaw ti defense team ni dati a Presidente Rodrigo Duterte iti International Criminal Court (ICC) ti interim release ti dati a presidente gapu iti maipagarop a pannakaitantan ken saan a pannakasolbar ti logistical issues iti panangtingiting iti kabaelan na a sumango iti trial.
Basar iti depensa iti panangidaulo ni Atty. Nicholas Kaufman, bigbigbigen da ti panangikarkarigatan ti Registry iti panagisagana ti redacted materials para iti konsiderasyon ti Pre-trial Chamber.
Nupay kasta, inpetteng ti depensa a ti isyu maipanggep iti salun-at ti dati a presidente ket immunan nga indasar da sakbay ti inisyal nga isasango na ken dua a request metten para iti status conference iti maysa a “considerable time ” ti naisumitir tapno masolbar ti isyu, banag a kinontra ti prosekusyon.
Inpalgak ti depensa nga itantan nga awan ti kasiguradwan ti confirmation of charges, iti baet ti immuna a pammilin ti Pre-Trial Chamber para iti ababa nga adjournment laeng.
Inkalintegan pay ti depensa ti logistical issues a dinakamat ti Registry a mabalin a maipagarop a mangpabayag ti trial ken ti pannakaitantan daytoy ket mangsuporta iti kaso para iti provisional release ti dati a presidente.
Nangirekomendar met ti depensa ti nayun a kondisyon tapno maalay-ayan ti panagamak seknan iti possible a pannakawaya-waya ti dati a presidente, banag a saan a nairaman iti filing.
Masapol koma pay a saan nga agtalinaed iti International Criminal Court detention facility ti dati a presidente kabayatan ti pannakaiyuswat ti proceedings iti salun-at na kangrunaan na ket namnamaen nga agpaot daytoy.
Gapu iti daytoy, kuna ti depensa a rumbeng a mapalubusan ti interim release ti dati a presidente iti kabiitan a panawen gapu ta saanen a resoanable ti agtultuloy a pannakaibalud ni Duterte.
Inpasigurado met ti depensa a saan a makaapektar ti pannakawaya-waya ni dati a Presidente Duterte iti agtultuloy a trial.
Iti agdama ket awan pay ti inisyu a ruling ti International Criminal Court iti interim release request ken agdama a nakapenpen ti confirmation of charges kalpasan a kiniddaw ti depensa nga i-adjourn indefinitely ti trial gapu ta maipagarop nga agpaspasr ti dati a presidente ti cognitive impairment a makaapektar iti kabaelan na a sumango iti trial.
