LAOAG CITY – Inbatad ni Atty. Arnedo Valera, international lawyer idiay Amerika a dua ita ti misyon ti Estados Unidos pakaseknan iti mapaspasamak ita idiay Afghanistan.
Daytoy ket ti evacuation mission ken ti panangtiliw da iti ISIS-K nga isu ti adda iti likudan ti panagbettak iti Kabul Airport.
Segun kenni Atty. Valera, maysa a karit iti panangtiliw ti Amerika iti ISIS-K ket no kasano ti pannakikooperar kadakuada ti Taliban.
Kunana a ti saludsod ita ket no kasano a serken ti US military ti kuta ti ISIS-K nangruna ket nakatutok da iti evacuation mission da nangruna ket umasidegen ti deadline nga Agosto 31.
Inadmitir ni Atty. Valera nga adda ti panagamak na gapo ta posible a makikappeng ti Taliban iti ISIS-K nangruna ket idi 2001, inlemmeng ti Taliban ti numero uno a terorista a ni Bin Laden.
Kunana a kabayatan ti agtultuloy a panagbakwit, rumbeng met a makita latta ti garaw ti Taliban.
