LAOAG CITY – Nagballaag ti Iran a mabalin a maapektaran ti maipatpatungpal a ceasefire understanding daytoy iti Estados Unidos no agtultuloy dagiti panangatake ti Israel idiay Beirut, Lebanon iti baet ti kumarkaro a tension iti rehion.
Inbatad ni Iranian Foreign Minister Abbas Araghchi a ti katulagan iti Washington ket mangdakdakamat ti panagsardeng ti gubat pakairamanan iti Lebanon ken aniaman a panaglabsing iti maysa a lugar ket mabalin nga agresulta iti pannakapukaw ti sibubukel a katulagan.
Ti rakurak ket kagiddan ti pammilin ni Israeli Prime Minister Benjamin Netanyahu a mangiwayat ti airstrikes iti Dahieh district iti Beirut nga inawaganna a “terror infrastructure” nga adda ti pakainaiganna kadagiti panangatake ti rocket ken drone a maikonkonektar iti Hezbollah.
Inrakurak ni United States President Donald Trump nga agtultuloy ti pannakisarsaritana iti agsinnungbangir a partido pakairamanan ni Netanyahu ken dagiti pannakabagi iti Hezbollah.
Iti social media post, kuna ni Trump nga awan ti kameng ti pagilianda nga ipatulod iti Beirut gapu iti maipatpatungpal a katulagan nga isardeng ti gubat kasukat ti panagsardeng ti Israel iti panagbomba iti Lebanon.
Nupay kasta, awan ti kumpirmasion iti maibagbaga a direkta a komunikasion ti Amerika ken Hezbollah.
Kinumpirman met ni Netanyahu ti pannakisarsarita ken ni Trump ngem inpettengna nga agtultuloy ti Israel iti operasion kontra iti Hezbollah no agtultuloy dagiti militante a grupo iti panangatake kadagiti sibilian ti Israel.
