LAOAG CITY – Ti El Nino phenomenon ket saan laeng a pakaigapuan ti panagmaga dagiti pagtaudan ti danum ken panagngato ti temperatura ti lubong, apektaranna pay ti produksion ti itlog iti Pilipinas, maibasar iti Philippine Egg Board Association.
Kinuna ti presidente ti Egg Board a ni Francis Uyehura a ti nakaro a pudot ket nagresulta iti saan nga umdas a pannangan dagiti manok a mangitunda ti manmano laeng ken basbassit nga itlog.
Inpakdaarna nga immadu ti chicken mortality gapu iti nakaro a pudot a nakarkaro iti akin-amianan a paset ti pagilian.
Sumangsango itan dagiti agtartaraken iti manok iti nalabes a suplay dagiti babassit nga itlog nga agdama a mailaklako iti nababbaba a presio.
Dinakamatna a bimmassit met ti egg consumption gapu iti kaawan dagiti pasken iti katengngaan dagiti napudot a bulan kasta met ti panagadu ti nakanselar nga aldaw ti panagbasa gapu iti pudot.
Iti agdama, agarup P4.50-P5.40 ti presio dagiti kalalainganna ti kadakkelda nga itlog, depende iti lugar, basar iti Uyehura.
