LAOAG CITY – Nangipaay ti loan ti Japan iti P11.54 billion kas tulong tapno mapundoan ti sumaruno nga addang ti Universal Health Care program iti pagilian.
Basar iti Department of Foreign Affairs a ti nasao a loan ket para iti Build Universal Health Care Program Subprogram 3-Emergency Support (BUHC3).
Nagbinnuligan ti Japan International Cooperation Agency ken Asian Development Bank a pundoan ken isayangkat ti programa.
Kuna ti Department of Foreign Affairs a pinirmaan ti Pilipinas ken Japan ti diplomatic notes kas panangkumpirmar ti katulagan mainaig iti gagem ti loan ken general term ngem saanda nga inbatad dagiti detalye mainaig iti interest rate wenno iti repayment period.
Segun ken ni Foreign Affairs Secretary Ma. Theresa Lazaro, ti katulagan ket pasingkedanna ti natibker a panangikagumaan ti dua a pagilian tapno maipasigurado ti de kalidad, accessible ken equitable nga healthcare para kadagiti umili.
Kabayatanna, gagem ti loan a mangsuporta ti healthcare financing ken purchasing, mangiwayat ti de kalidad a serbisio ken mapaimbag ti information management ken performance accountability.
