LAOAG CITY – Kinumpirmaran ni Department of Justice Secretary Jesus Crispin Remulla a nabayagen nga am-ammo na ti dimmatag a testigo mainaig iti panagpukaw ti 34 a sabungero.
Kuna pay ni Remulla a nakasarita ken nainterview nan ti madakdakamat a testigo sakbay pay ti eleksyon idi Mayo ita a tawen isut gapuna nga addan ti ideya na mainaig iti impormasyon nga inrakurak ni alyas ‘Totoy’ a nangibutaktak a napapatay dagiti nasao a sabungero.
Inrakurak pay ni alyas Totoy a dagiti saan pay a nabirukan a 34 a sabungero ket naitabon iti Taal Lake ti Batangas.
Gapu iti daytoy, inpetteng ni Justice Secretary Remulla ti kinapateg a maala dagiti bangkay wenno uray dagiti tultulang laeng dagiti biktima.
Innayon na a babaen iti daytoy ket mapaneknekan ken maaddaan ti pruweba dagiti inbutaktak ni alyas ‘Totoy’.
Mainaig iti daytoy, inpakaammo ni Justice Secretary Remulla a manarimaanen nga iprosproseso ti departamento dagiti inbutaktak ni alyas ‘Totoy’.
