LAOAG CITY – Sumurok-kumurang P100 billion ti insertions iti 2025 General Appropriations Act.
Inbatad ni Senate President Pro Tempore Ping Lacson a kaaduan kadagiti Senador iti 19th Congress ket nangikabil ti insertions basar iti panagsukisokna.
Kunana a kaaduan kadagitoy nga individual insertions ket naka-for later release a nagbalin a rason ti pannakakigtotna iti pakabuklan a gatad.
Inlawlawagna a saan pay a nakakita ti kastoy a kadakkel a pakabuklan idi ken indasigna iti situasion iti panawen sakbay nga indeklarar nga unconstitutional ti Priority Development Assistance Fund no sadinno a ginasgasut laeng a milyon a pisos ti masansan a mairamraman.
Inpetteng ni Lacson, dakkel ti panagbalbaliw ken nasken nga ikkan ti importansia ti transparency iti panangikabil kadagiti item iti budget.
Nagpanawagan isuna iti naig-iget a panangtingiting ken panangipalawlawag manipud kadagiti nangiserrek ti pundo tapno masigurado a saan daytoy a mausar iti panangpabor kadagiti sumagmamano nga opisial.
Agtultuloy a banbantayan ti Senado ti nasao a banag kabayatan a rumrummuar dagiti detalye ti 2025 General Appropriations Act.
