LAOAG CITY – Maysa a miniature horse idiay South Carolina, U.S.A. ti nakairekord ti world record iti naidumduma a kaatiddog ti ipus daytoy.
Kinumpirmaran ti records keeping organization a Guinness World Records a ti kabalyo a ni Sweetie ti baro a record holder ti titulo a “Longest Tail on a Miniature Horse” gapu ta addaan ti kaatiddog ti ipus daytoy a 5 a kadapan ken 11.26 a pulgada.
Iti sobra a kaatiddog ti ipus ni Sweetie, at-atiddog pay no idasig iti height-na a 3 feet ken 1 inch. Ni Sweetie ket maysa a miniature horse ken agtawen ti 36.
Kuna ti akinkukua ken ni Sweetie a ni Risa Formisano, nangrugi nga immatiddog ti ipus ti tarakenna idi 2012. Nariparna a sumayad payen ti ipusna agingga a nagtultuloy daytoy nga immatiddog.
Kabayatanna, tapno saan a maperdi ti ipusna ket inbaudda daytoy nga arig ket naka-ponytail tapno saan a sumayad no agtaray. Mamindua a daras iti maysa a tawen a ma-sham-shampoo ken maik-ikkan ti conditioner.
