LAOAG CITY – Ti Nano Tracks N320 ket maysa a miniature remote-controlled excavator nupay 1/64 laeng ti aktwal a kadakkel ti pudno nga excavator ket saan nga ay-ayam no di ket maysa a fully functional nga excavator.
Basar iti website ti Nano Tracks N320, daytoy ket addaan ti innem a fully independent, proportional motors a mangipapaay ti precise control iti tunggal garaw.
Addaan daytoy ti electronic slip ring ken dagiti independently controlled boom, dipper, bucket, swing ken dagiti track.
Inbatad ni Jonathan Abbott, ti nangpartuat ti Nano Tracks N320, nangrugi isuna addan ti dua a tawen ti napalabas idi maduktalanna iti YouTube ti maysa nga hobbyist group nga agay-ayam babaen iti babassit a remote controlled excavators.
Naragsakan daytoy isu a nangrugi daytoy nga agbirok kadagiti nagduduma a klase ti excavators online ngem awan ti nakitana isu a nagdesision daytoy nga agaramid ti bukudna a partuat.
Kalpasan ti 2,300 nga oras iti panangaramid daytoy, nagballigi isuna ken inrubuatna iti Kickstarter tapno makaukkon ti pundo tapno makapartuat daytoy ti adu ken mailako iti merkado.
Iti agdama, agbalor ti $120 ti maysa a Nano tracks N320.
